Nino Barone

COM'E' C'ACCUMINCIO' CHIST'AMICIZIA
di Antonio Sindona



Vulissi raccuntari a cu nni leggi
com'è c'accuminciò chist'amicizia ...
chi comu 'n suli splenni ch'i so raggi
picch'idda è vera e nun teni malizia!...

Fu quannu, pi 'n concorsu chi facivu,
ju vitti lu Baruni chi liggiva
e mi nni stavu dda chi l'ascutavu
taliannu l'espressioni chi faciva ...

E mentri chi liggiva "M'arricordu" (*)
ju vitti ch'Iddu s'era emozionatu ...
e dd'espressioni ju nun mi la scordu
e di ddu jornu tuttu è cuminciatu ...

D'appressu quarchi misi, ddà vicinu
nni vittimu "p''u trenu d''i pueti" (**)
La festa chi mi fici "mastru" Ninu!
Mi parsi ch'Iddu avia truvatu 'n frati!

Ci desi lestu tutt'a me' amicizia
picchì sintiva ch'era 'n bravu figghiu.
Lu dissi prima, 'un avi dda malizia,
ju lu sintiva e, certu, nun mi sbagghiu!

Di tannu nni sintemu spissuliddu
sapennu sempri chi 'n t''a nostra vita,
lu sacciu ju e 'u sapi puru Iddu,
li veri amici si cuntanu 'n t''i dita!

Ninuzzu miu, ma cu mi l'avia a diri
chi mentri tu parravi comu 'n Vati
ti canuscivu, e ora, un si ci criri:
ju da ddu jornu m'attrovu 'n autru frati!





(*) Poesia 2° class. nel concorso "Poesie in barca a vela" ed. 2008
(**) Manifestazione organizzata dalla Scuola Poetica di Struttura Nuova a Partinico